Når vi skal lage ein strategi eller plan for sosiale medier, bruker vi POST-modellen, som gir ei systematisk tilnærming til sosial strategi. POST-modellen er utvikla av Forrester Research.

Dei fleste bedrifter som trår feil når dei tar steget ut i sosiale medier gjer det fordi dei eigentleg ikkje veit kva slags mål dei ønsker å oppnå. Gjennomfører bedrifta di den sosiale strategien sin baklengs?

Viss du startar med å seie ”Vi treng ein blogg” eller ”Vi burde ha ei side på Facebook”, er svaret sannsynlegvis ja.

I alle andre bestrebelsar innan forretningslivet startar vi med å finne ut kva vi ønsker å oppnå. Sosial teknologi er ikkje magi. Teknologi hjelper oss også til å nå mål. Det er på tide å slutte å gjere tiltak i sosiale medier fordi det er kult. Det er på tide å gjere tiltak fordi dei gir effekt.

For å hjelpe kundar med denne fundamentale idéen har Forrester Research laga eit akronym som dei kallar POST. Modellen er kjernen i boka Groundswell, som er hovudboka på kurset Sosiale medier på BI.

P for People/menneske

Ikkje begynn å lage ein strategi for sosiale medier før du kjenner til kva slags ferdigheiter publikumet ditt har innan sosiale medier. Dersom du rettar deg mot studentar, bruk sosiale nettverk. Viss du skal nå forretningsreisande, vurder ratingar og anbefalingar. Forrester tilbyr data for å hjelpe med dette, men du kan også gjere estimat sjølv. Berre ikkje begynn utan å ha tenkt på det.

O for Objectives/mål

Skal du lytte til kundane dine, eller snakke med dei? Er målet med å bruke sosiale medier å støtte kundane dine? Eller er det å gi energi til dei beste kundane og forsterke den positive varepraten deira om produkta dine, slik at dei kan ”frelse” andre? Eller prøver du å samarbeide med kundane? Bestem deg for mål før du bestemmer deg for teknologi eller plattform. Finn så ut korleis du skal måle i kva grad målet er nådd.

S for Strategy/strategi

Strategi betyr i denne samanhengen å finne ut kva som vil vere annleis når du er ferdig. Vil du ha ein tettare, to-vegs-relasjon med dei beste kundane dine? Vil du at folk skal snakke om produkta dine? Vil du ha ei permanent fokusgruppe som skal teste produktidéar og generere nye? Sjå for deg at du lykkast. På kva slags måte vil det vere annleis etterpå? Sjå for deg endepunktet, og du vil vite kvar du skal begynne.

T for Technology/teknologi

Er det eit nettsamfunn, ein wiki eller ein blogg som best vil bringe deg nærmare målet ditt? Så snart du kjenner menneska eller målgruppa di, måla dine og strategien, då kan du bestemme deg for val av teknologi eller sosiale plattformer.

Kjelde: Forrester